У Віцебску вырашылі сабрацца ўвечары 26 красавіка на плошчы Свабоды
Дэмакратычную грамадскасць Віцебска ўвогуле пазбавілі магчымасцяў атрымаць дазвол на правядзенне любых акцый.
Мясцовыя актывісты падавалі заяўку на правядзенне акцыі да ўгодкаў аварыі на Чарнобыльскай АЭС ва ўскраінным Парку культуры і адпачынку чыгуначнікаў. Атрымаўшы адмову, яны вырашылі сабрацца ўвечары 26 красавіка ў цэнтры Віцебску ў 17.30 на плошчы Свабоды, каб разам прыняць зварот да урадаў Расіі і Беларусі пра небяспеку будаўніцтва новай Астравецкай АЭС.
Каардынатар руху "За свабоду" у Віцебскай вобласці Хрыстафор Жаляпаў распавёў, што віцебскія актывісты мелі намер правесці мітынг – выказаць салідарнасць з пацярпелымі ў выніку аварыі на АЭС у Японіі і ўшанаваць памяць ахвяраў аварыі на Чарнобыльскай АЭС:
"У адказ на нашу заяўку мы атрымалі адмову з адміністрацыі Чыгуначнага раёну",- распавёў Жаляпаў . Для дазволу неабходна заключыць дамовы наконт аховы правапарадку, медычнае абслугоўванне і паслугаў ЖКГ. Адказныя асобы гэтых структур патлумачылі, што дамовы заключаць толькі пасля атрымання дазволу на мерапрыемства.
Два месяцы таму віцебскія дэмакратычныя актывісты звярталіся ў гарвыканкам, каб памяняць парадак атрымання дазволаў на акцыі. Але атрымалі адказ, што гэтае рашэнне ўнесена ў Нацыянальны рэестр прававых актаў, прайшло экспэртызу на адпаведнасць сучаснаму беларускаму заканадаўству, і таму перагляду не падлягае, паведамляе праваабарончы цэнтр "Вясна".
"Такім чынам, дэмакратычную грамадскасць Віцебска ўвогуле пазбавілі магчымасцяў праводзіць любыя акцыі. Бо прычына адмовы закладзена ў ранейшым рашэнні гарвыканкаму", -- гаворыць Хрыстафор Жаляпаў.
