Сябру Міжнароднай назіральнай місіі Беларусь адмовіла ва ўездзе
Ноч Максім Кіцюк правёў у камеры і раніцай на цягніку "Санкт-Пецярбург – Кіеў" быў адпраўлены ва Украіну, да станцыі Гарнастаеўка, са штампам "дэпартаваны".
Памочніку прадстаўніка Міжнароднай назіральнай місіі Камітэта міжнароднага кантролю за сітуацыяй з правамі чалавека ў Беларусі, сябру "Фундацыі Рэгіянальных Ініцыятываў", грамадзяніну Украіны Максіму Кіцюку было адмоўлена ў перасячэнні беларускай мяжы.
Інцыдэнт адбыўся 9 сакавіка ў 3:20, падчас перасячэння мяжы на цягніку "Кіеў – Мінск".
Як паведаміў калега Кіцюка Антон Галабародзька, па словах супрацоўніка Гомельскага пагранічнага атрада, з якім звязаліся па тэлефоне, адмова была аргументаваная тым, што Максіму забаронены ўезд у Беларусь. У 9:10 цягніком "Санкт-Пецярбург – Кіеў" Максім Кіцюк быў адпраўлены назад ва Украіну.
Па словах Кіцюка, з цягніка яго знялі Беларускія памежнікі: пры праверцы дакументаў высветлілася, што яго прозвішча лічыцца ў базе дадзеных Пагранічнай службы з пазнакай "Уезд забаронены", паведамляе праваабарончы цэнтр "Вясна".
