Севярынец: Перамовы аб вызваленні палітвязняў вядуцца таксама і з Ватыканам
Сяргея Каваленку вызвалілі праз суткі пасля сустрэчы з прадстаўніком Папы Рымскага.
Прашэнне аб памілаванні віцебскі апазіцыянер Сяргей Каваленка напісаў яшчэ 25 чэрвеня. Тады яму паабяцалі, што выйдзе на свабоду да Дня незалежнасці. Але чакаць прыйшлося тры месяцы. Каваленка быў вызвалены толькі пасля парламенцкіх выбараў. Палітолаг Аляксандр Фядута лічыць, што гэта супадзенне, а прычынай вызвалення называе беларуска-расійскія перамовы.
“Гэта ніяк не звязана з правядзеннем парламенцкіх выбараў у Беларусі. Пачынаецца чарговы раўнд перамоваў з Расіяй на тэму нафты. І трэба даваць пэўныя сігналы Захаду, што беларускі рэжым не такі дрэнны, якім яго малюе апазіцыя. І не больш”.
Сігнал атрымаўся нядрэнны. Тым больш што пасля Каваленкі могуць выпусціць і анархіста Паўла Сырамалотава.
Сам Каваленка не ведае, з чым звязанае такое доўгае чаканне вызвалення. У калоніі яго запэўнівалі, што адпусцяць праз тры дні пасля падачы прашэння. Паводле слоў былога палітвязня, адміністрацыя калоніі таксама была здзіўленая затрымкай.
З іншага боку, Сяргей Каваленка ў прашэнні не раскаяўся і нават віны не прызнаў. Гаворыць, што адмовіўся ад гэтага, нягледзячы на парады турэмнай адміністрацыі.
“Меркаваў, што можа быць па-рознаму. Бо я прашэнне аб памілаванні пісаў без раскаяння і без прызнання віны. Я адмовіўся ад гэтага, сказаў, што ганаруся тым, што зрабіў. Тады яны папрасілі проста напісаць: “Прашу мяне вызваліць”.
На волі Сяргей Каваленка расказвае пра тое, што літаральна за некалькі гадзін перад навінай аб вызваленні ён сустрэўся з прадстаўніком Папы Рымскага ў Беларусі, арцыбіскупам Клаўдыё Гуджэроці. На думку іншага палітвязня, з якім сустракаўся Гуджэроці, — Паўла Севярынца — гэта не проста супадзенне.
“Не думаю, што гэта супадзенне. Напэўна, перамовы вядуцца таксама і з удзелам дыпламатаў Ватыкана. Праўда, тут немагчыма сказаць, што ёсць адзнакай чаго”.
Севярынец таксама дадае, што даведацца сапраўдныя прычыны вызвалення палітвязня складана. Маўляў, беларускія ўлады ў сваіх рашэннях часта кіруюцца зусім не логікай і прагматызмам. Абвергнуць гэтыя словы складана. А вось ці будуць новыя вызваленні, пакажа час.
