Пакуль выязныя, але напалоханыя

Да гэтага часу Памежны камітэт не вырашыў, якім чынам пакараць актыўных удзельнікаў акцыі пратэсту ў Брузгах. Раней незадаволеных абмежаваннямі па вывазе з краіны паліва абяцалі зрабіць невыязнымі ўнутраным рашэннем памежнікаў.

Але пакуль, кажа кіраўнік прэс-службы Памежнага камітэта Аляксандр Цішчанка, спіс невыязных не складзены.

Аляксандр Цішчанка: “З тымі, хто быў затрыманы, з арганізатарамі праца яшчэ праводзіцца. А каб ўсіх не пускаць... Уявіце: ці ёсць сэнс і ці ёсць магчымасць? А тут (у расказах, што не пусцілі памежнікі ў Польшчу выключна з-за удзелу ў акцыі — Еўрарадыё) — самаўзвышэнне, надумлівасць. Чалавеку трэба расслабіцца і заняцца справай”.

Але Сяргей, які быў аштрафаваны “за Брузгі” на 2 мільёны 625 тысяч, ехаць у Польшчу пакуль не рызыкуе. Хоць ужо з апошняй паездкі прайшло нашмат больш за 5 дазволеных дзён.

Сяргей: “Бо казалі, што з Ваўкавыска знаёмыя ехалі і іх не прапусцілі. Можа, яны пакуль штраф не заплацілі. А можа — увогуле зрабілі невыязнымі”.

А вось Міхаіл рызыкнуў. Нягледзячы на тое, што ў Брузгах ён падчас акцыі быў. Хлопца ў міліцыю выклікалі. Але не як удзельніка, а ў якасці сведкі. Ніякіх праблем на мяжы Міхаіл не меў. Згодна з яго словамі, нават і не запыталіся, колькі пачак цыгарэт ён вязе.

Міхаіл: “Мяне не правяралі. Але я так разумею, што моцны агляд ідзе тады, калі едзеш часцей за адзін раз на пяць дзён. А калі 1 раз на 5 дзён, то, здаецца, нармальна, не глядзяць асабліва. Можа, гэта часовая рэч, потым пачнуць, але пакуль — цішыня”.

Пра “цішыню” ў выкананні пастановы аб абмежаванні вывазу тавараў за мяжу, гаворыць і Андрэй, які днямі выязджаў у Польшчу.

Андрэй: “Я пад’ехаў адразу да памежніка, і ў мяне нават нічога не запыталіся — пашпарт адштампавалі і на “зялёны” канал накіравалі. З боку мытнікаў і памежнікаў усё нармальна прайшло”.

Жыхар Брэста Ежы ў акцыі на памежным пераходзе не ўдзельнічаў, але хадзіў з “народнай петыцыяй” да мясцовых уладаў у аблвыканкам. Такім чынам — нязгоду сваю з рашэннем кіраўніцтва краіны выказаў.

Ежы: “Я ехаў на пяты дзень, як дазволена. Ехалі па зялёным калідоры, і мытнікі паставіліся да нас лаяльна”.

Але нягледзячы на такі лібералізм, ўсе суразмоўцы Еўрарадыё адзначылі: памежны бізнэс фактычна знік. Асабліва пацярпелі тыя, для каго ён быў асноўным заробкам.

Фота: bymedia.by