Адзін закон пра Дзень Незалежнасці адмянілі, а іншы пакінулі ў сіле
Лукашэнка адмяніў адмысловы дэкрэт аб прызначэнні Дня Незалежнасці. Але захаваў пазнейшы ўказ, якім гэтае свята прызначаецца разам з шэрагам іншых.
19 красавіка Аляксандр Лукашэнка падпісаў Указ № 166. Гэтым
дакументам былі адмененыя 85 Дэкрэтаў, Указаў і іх асобных частак. Першым у
спісе значыцца Дэкрэт прэзідэнта ад 11 снежня 1996 № 1 “Аб прызначэнні
дзяржаўнага свята – Дня Незалежнасці Рэспублікі Беларусь”.
Няўжо Лукашэнка адмяніў Дзень Незалежнасці? Па каментар Еўрарадыё звярнулася ў прэс-службу кіраўніка. Аднак там Указ № 166 ніяк не пракаментавалі: маўляў, і прэс-сакратар прэзідэнта Павел Лёгкі, і яго намеснік зараз у камандзіроўках і будуць у Мінску толькі позна ўвечары 26 красавіка.
У інтэрнэт-банку прававой інфармацыі Еўрарадыё знайшло указ прэзідэнта ад 26 сакавіка 1998 года № 157 “Аб дзяржаўных святах, святочных днях і памятных датах у Рэспубліцы Беларусь”. Другой часткай гэтага дакумента Дзень Незалежнасці Рэспублікі Беларусь (Дзень Рэспублікі) прызначаецца на 3 ліпеня.
Такім чынам, нягледзячы на адмену Дэкрэта 1996 года, Дзень Незалежнасці застаецца на сваім месцы – 3 ліпеня, бо ён прызначаны пазнейшым указам кіраўніка краіны.
Фота: toxaby.livejournal.com
