У Мірскім замку абмяркуюць тэатральнае мастацтва і ахову спадчыны
26 студзеня ў Мірскім замку пройдзе першае паседжанне грамадскага савету па справах культуры і мастацтва.
Савет абмяркуе развіццё культуры ў Беларусі, праблемы тэатральнага мастацтва і эстэтычнае выхаванне. Пра гэта ў размове з Еўрарадыё паведаміла прэс-сакратар Міністэрства культуры Ганна Смольская
Смольская: "Гэта першае паседжанне. Яно будзе ўсталёвачным. На ім будуць акрэсленыя перспектывы і прапановы далейшай працы савета. Вызначаныя дзве асноўныя тэмы, якія будуць абмяркоўвацца ў красавіку і ў кастрычніку: тэатральнае мастацтва і ахова гісторыка-культурнай спадчыны".
Нагадаем, Рэспубліканскі грамадскі савет быў створаны 29 лістапада як кансультатыўны орган пры Савеце міністраў. У склад савета ўваходзяць 68 дзеячоў культуры, старшынём абраны міністр культуры Павал Латушка.
