За 500 дзён да Алімпіяды ў Лондане Беларусь мае толькі 2 ліцэнзіі

Прэзідэнт даручыў беларускім спартоўцам заваяваць на Алімпіядзе-2012 у Лондане не менш за 25 медалёў. Да гульняў засталося 500 дзён, але пакуль што наша краіна мае толькі 2 алімпійскія ліцэнзіі стралкоў Сяргея Мартынава і Вікторыі Чайкі.

"Падрыхтоўка да Алімпійскіх гульняў складаецца з 4-х цыклаў. Мы сёння ўжо на 3-м цыкле, сёння да Алімпіяды 2012 года ў Лондане рыхтуюцца 275 кандыдатаў ад Беларусі па 31 відзе спорту, — супакойвае міністр спорту і турызму Алег Качан. — У 2011 годзе мы спадзяемся на кулявую стральбу (там, дзе ўжо маем ліцэнзіі), цяжкую атлетыку, вольную і грэка-рымскую барацьбу, мастацкую гімнастыку, акадэмічнае веславанне, веславанне на байдарках і каноэ, бокс".

Алег Качан

Адным з прэтэндэнтаў на ўдзел у гульнях 2012 года па-ранейшаму застаецца скандальны штангіст Андрэй Арамнаў. Нягледзячы нават на допінгавыя санкцыі з боку Міжнароднай федэрацыі цяжкай атлетыкі.

"Прэтэнзіі да Арамнава па фармакалогіі з боку Міжнароднай федэрацыі па лёгкай атлетыцы часовыя, і неўзабаве яны будуць знятыя, — сказаў Алег Качан. — Мы верым, што ён пройдзе ўсе адборачныя стадыі і прадставіць нашу краіну ў Лондане. І мы разлічваем на яго медаль".

Па словах міністра, на 21-гадовага юнака па-ранейшаму ціснуць слава і ўсеагульная ўвага. Але з падрыхтоўкай Арамнава да спаборніцтваў праблем няма.

Алег Качан: "У яго з асабістым трэнерам падпісаны мной індывідуальны план падрыхтоўкі. Ён рыхтуецца да чэмпіянату Еўропы, але выступіць там яму, цалкам магчыма, перашкодзіць траўма. Траўма невялікая. Але, нават калі так, дык увосень ён дакладна будзе ўдзельнічаць у чэмпіянаце свету, і там будзе прэтэндаваць на алімпійскую ліцэнзію".

Арамнаву ўсяго 21 год, але Алімпіяда ў Лондане для яго будзе ўжо другой па ліку. Легендарная вяслярка Кацярына Карстэн рыхтуецца да 5-х у сваёй кар'еры Алімпійскіх гульняў. За 17 гадоў, якія беларусы ўдзельнічаюць у Гульнях самастойнай камандай, шмат чаго змянілася... Напрыклад, прызавыя нашых алімпійцаў павялічыліся роўна ў 10 разоў:

"У 1994 годзе, калі Беларусь упершыню ўдзельнічала ў Алімпійскіх гульнях, прызавыя складалі: за "золата" — 15 тысяч долараў, за "срэбра" — 7,5 тысяч, за "бронзу" — 5 тысяч. Паводле апошняга ўказа аб падтрымцы алімпійцаў, у Лондане уладар залатога медаля атрымае 150 тысяч долараў, срэбнага — 75 тысяч, бронзавага — 50 тысяч. І ў Сочы таксама", — распавёў генеральны сакратар НАК Беларусі Георгій Катулін.

Георгій Катулін

Так, прызавыя беларускіх пераможцаў Алімпійскіх гульняў неспадзявана апярэдзілі прэміі расійскіх спартоўцаў. У Расіі алімпіец атрымлівае ад дзяржавы за залаты медаль 100 тысяч еўра, ці крыху менш за 140 тысяч долараў. Праўда, "срэбра" і "бронза" ў Расіі па-ранейшаму аплачваюцца больш прыстойна.

За найноўшую гісторыю Беларусі алімпійскімі чэмпіёнамі сталі 11 спартоўцаў. Усяго ж за ўсю гісторыю Алімпійскага руху на вышэйшыя прыступкі гульняў узняліся 69 беларусаў.

Фота: steinherz.ru, Еўрарадыё.