Санкцыі ЗША Мінскаму заводу колавых цягачоў не пагражаюць?
Ніякага дачынення да прыдпрыемстваў, на якіх распаўсюджваюцца эканамічныя санкцыі, яны не маюць, сцвярджаюць на заводзе.
Пра гэта Еўрарадыё даведалася ад дарадцы генеральнага дырэктара Мінскага завода колавых цягачоў Аляксандра Гука:
“У “КБ Радар” уваходзіць, сярод іншых, ААТ “Волат-аўта”. Мы да гэтага прадпрыемства ніякіх адносінаў не маем. Мы ніколі не былі іх даччыным прадпрыемствам”.
Нагадаем, днямі дзярждэпартамент ЗША паведаміў аб новых санкцыях ЗША супраць беларускіх прадпрыемстваў. Гэта — кампаніі “ТМ Сервісіз” і Рэспубліканскае навукова-прамысловае ўнітарнае прадпрыемства КБ “Радар”, а таксама іх дачынныя структуры.
Як паведамляла Еўрарадыё са спасылкай на "Народную волю", кіруючай кампаніяй холдынгу "Сістэмы радыёлакацыі" з'яўляецца ААТ "КБ Радар". Таксама ў холдынг уваходзяць ААТ "Алевкурп" і ААТ "Волат".
"Волат" — гэта брэндавая назва Мінскага завода колавых цягачоў. І менавіта ён наўпроставых адносінаў да ААТ "КБ Радар", на які распаўсюджваюцца санкцыі, не мае. Тым не менш прадстаўнік Мінскага завода колавых цягачоў не адмаўляе супрацы з гэтым прадпрыемствам.
Аляксандр Гук: “Супрацоўнічаць мы супрацоўнічаем, але гэта чыста камерцыйныя адносіны, але ў іх холдынг мы ніколі не ўваходзілі”.
Але гэта азначае, што для “КБ Радар” Мінскі завод колавых цягчоў вырабляе платформы вайсковага прызначэння. І гэты факт не дае магчымасці Аляксандру Гуку казаць, што на іх санкцыі ЗША дакладна не распаўсюджваюцца: “Гэтага я не ведаю, але тое, што было пра нас напісана — гэта няпраўда”.
