Нацбанк: Расійскі крэдыт цалкам ляжа ў золатавалютныя рэзервы

Расійскі крэдыт у $3 млрд., які Беларусь спадзяецца атрымаць у траўні, будзе цалкам захаваны ў золатавалютных рэзервах краіны. Пра гэта Еўрарадыё паведаміў кіраўнік Упраўлення інфармацыі Нацбанка Анатоль Драздоў:

“Што датычыцца расійскага крэдыту — было заяўлена шчыра і недвухсэнсоўна, што ён будзе накіраваны ў золатавалютныя рэзервы краіны”.

Такім чынам, у абменніках грошы, выдаткаваныя Расіяй, не з’явяцца.

“Траціць золатавалютныя рэзервы Нацыянальнаму банку забараніў прэзідэнт”, — працягвае Анатоль Драздоў.

Наконт таго, як будуць выкарыстаныя грошы, выдаткаваныя Расіяй, незалежны аналітык Сяргей Чалы адказвае адназначна: іх “праядуць”. Маўляў, жадаючых “засвоіць” іх у Беларусі хапае, і, хутчэй за ўсё, крэдыт ужо цалкам падзелены паміж прадпрыемствамі, якім неабходная валютная падтрымка.

На думку Вадзіма Іасуба, фінансавага аналітыка афіцыйнага партнёра “Альпары” у Мінску, крэдыт сапраўды “асядзе” у золатавалютных рэзервах Беларусі. Гэта добра выглядае, калі прыгадаць нядаўняе абяцанне старшыні НББ Пятра Пракаповіча давесці беларускія ЗВР да $10 млрд. Але не мае вялікага сэнсу:

Вадзім Іасуб: “Аб тым, каб крэдытам закрыць дзіркі ў эканоміцы, гаворка не ідзе. Пры тых тэмпах зніжэння золатавалютных рэзерваў, якія назіраліся ў першым квартале, 1 мільярд можа вырашыць пытанне на пару месяцаў. Адпаведна, 3 мільярды — максімум на паўгода. Гэта адсоўванне рашэння гэтых праблемаў на будучыню. Па-сутнасці, такая страусіная пазіцыя”.

Нагадаем, паводле статыстыкі Нацбанка, за сакавік 2011 года беларусы набылі 768,1 мільён долараў. Памер золатавалютных рэзерваў скараціўся за гэты месяц на 257,9 мільёнаў долараў і склаў (па стане на 1 красавіка) $5,25 млрд.

Дарэчы, расійскі крэдыт будзе апошняй пазыкай, якую нашая краіна зможа ўзяць у 2011 годзе. Пазычаць грошы надалей перашкодзіць бюджэт, згодна з якім ліміт беларускай дзяржпазыкі сёлета складае 13 мільярдаў долараў.

Згодна з сайтам Нацбанка, зараз гэтая пазыка складае 10 мільярдаў 57 мільёнаў долараў. Прыбавім яшчэ $3 млрд. ад Расіі — і атрымаюцца якраз тыя самыя 13 мільярдаў!

Незалежны аналітык Сяргей Чалы асаблівай праблемы ў гэтым не бачыць: “Яшчэ з часоў, калі ў нас ліміт быў 2 мільярды, яго рэгулярна падвышалі, калі наспявала такая неабходнасць. Напрыклад, парламент можа сабрацца на пазачарговую сесію… У ЗША, дарэчы, тая ж самая сітуацыя: там перыядычна пазыка падбіраецца да дазволенай. А пасля кангрэс прымае рашэнне — і ўсё нармалёва”.

Цікава, што калі Беларусь атрымае расійскі крэдыт ў 3 мільярды долараў, знешняя дзяржпазыка нашай краіны ўшчыльную падыйдзе да памера бюджэта. Нават калі лічыць па курсе Нацбанка! $13 млрд долараў пазыкі памнажаем на 3045 (курс долара на 26 красавіка) і атрымліваем 39,585 трыльёнаў рублёў. А бюджэт Беларусі на 2011 год зацверджаны ў памеры 39,611 трыльёнаў… Калі ж перавесці беларускі бюджэт у долары нават па “сціплым” рыначным курсе ў 4000 рублёў за долар — ён атрымаецца меншы нават за тыя $10,057 млрд. доўгатэрміновай знешняй пазыкі, якую мы маем зараз!

Але і гэта, на думку Сяргея Чалага, не праблема:

“Значэнне мае кошт абслугоўвання пазыкі — колькі за год трэба траціць па працэнтах, і, калі ёсць — на выплаты па асноўным целе”.

Сёлета ў беларускі бюджэт на абслугоўванне знешняй пазыкі закладзена 2,2 мільярды рублёў. Па словах Сяргея Чалага, асноўныя выплаты па знешняй пазыцы прыпадуць на 2012-2013 гады.