МЗС Беларусі рэкамендуе не ехаць у Японію “да стабілізацыі абстаноўкі”
Беларусаў, якія знаходзяцца ў прэфектурах Міягі, Фукусіма і Іватэ, заклікаюць з’ехаць на поўдзень краіны, альбо пакінуць Японію ўвогуле.
Як заявіў 17 сакавіка на брыфінгу ў Мінску прэсавы сакратар МЗС Андрэй Савіных, беларускі бок уважліва аналізуе афіцыйную інфармацыю кампетэнтных органаў Японіі ды экспертаў МАГАТЭ.
“Сітуацыя дастаткова складаная. У сувязі з гэтым мы рэкамендуем беларускім грамадзянам устрымацца ад паездак у гэту краіну да стабілізацыі абстаноўкі”, — заявіў Савіных.
Амбасада Беларусі ў Японіі працуе ў звычайным рэжыме. На дадзены момант яна ўсталявала аператыўныя кантакты з 75 беларускімі грамадзянамі, паведамляе БелаПАН.
