Ад чыноўнікаў запатрабуюць выкладаць у інтэрнэт інфармацыю пра сваю працу

Адпаведныя праўкі дэпутатам прапанавана ўнесці ў Закон “Аб інфармацыі, інфарматызацыі і абароне інфармацыі”. Пра гэта Еўрарадыё паведаміў старшыня камісіі Палаты прадстаўнікоў па прамысловасці, паліўна-энергетычнаму комплексу, транспарце і сувязі Дзмітрый Харытончык:

“У нас уся інфармацыя з’яўляецца агульнадаступнай. Ёсць толькі выключэнні. Вось, гэтыя выключэнні дакладна вызначаюцца ў гэтым законе — якая інфармацыя будзе адносіцца для службовага карыстання, так званага. І спіс такой інфармацыі будзе вызначаць Савет міністраў”.

Пакуль гэтага спісу ў дэпутатаў няма і працаваць над ім сумесна з Саўмінам яны не будуць. Што тычыцца зменаў у закон, якія пашыраюць інфармацыйную адкрытасць дзяржорганаў, то Харытончык назваў толькі адну прапанову — запатрабаваць, каб усе дзяржорганы абавязкова выкладалі на сваіх сайтах справаздачу аб выкананай цягам года працы.

Верагодна, чакаюць змены і супрацоўнікаў прэс-служб. Калі адпаведная праўка будзе зацверджаная, то прэс-службам… дазволяць прысутнічаць на нарадах дзяжорганаў! Але ў якой форме гэта будзе, дадае дэпутат, пакуль не вызначана — ідзе ўзгадненне “тэкстоўкі”.

Фота — sb.by