Мне няма пра што гаварыць з Лукашэнкам — Пашынян

Прэм'ер-міністр Арменіі Нікол Пашынян на прэс-канферэнцыі 31 студзеня адмовіўся каментаваць чарговыя выказванні Аляксандра Лукашэнкі. "Мой дыялог з Лукашэнкам завершаны. З ім мне больш спрачацца няма пра што", — сказаў ён.

"Яны пачалі цяпер падлашчвацца да Еўрапейскага Саюза, — гаварыў Лукашэнка ў дзень "выбараў". — Слухайце, гэта вельмі небяспечная гульня. Ён [Пашынян] знішчыць Арменію, супакойце яго там".

Арменія ніяк не адрэагавала ні на гэтыя словы, ні на нядаўнія "выбары" ў РБ.

Летась адносіны паміж Мінскам і Ерэванам абвастрыліся: амбасадары абедзвюх краін адкліканыя дадому. Нікол Пашынян заявіў, што ніводзін армянскі чыноўнік не наведае Беларусь, пакуль ва ўладзе ў краіне застаецца Лукашэнка. Ён абвінаваціў Аляксандра Лукашэнку ў тым, што той, будучы саюзнікам Арменіі па АДКБ, дапамагаў Азербайджану рыхтавацца да вайны супраць Арменіі. Адначасова адбыліся кантакты з кіраўніцай Аб'яднанага пераходнага кабінета Беларусі Святланай Ціханоўскай.