"Барабанны біт"— гімн барабаннаму мастацтву!

VI фестываль прайшоў без конкурснай часткі, а ўяўляў сабой гала-канцэрт лепшых барабаншчыкаў Беларусі — па задуме арганізатара і сапраўднага "бацькі" фестывалю, Аляксандра Сапегі, конкурс для маладых музыкантаў будзе ладзіцца раз на два гады, каб даць магчымасць удзельнікам лепш падрыхтавацца.

Тое, што цікаўнасць да фестывалю з кожным годам расце, паказвае і запоўненая па самыя берагі зала ДК МАЗ. Паслухаць лепшых музыкантаў краіны прыходзяць не толькі аматары добрай музыкі, але і студэнты музычных школ, вучэльняў, інстытутаў.

Дарэчы, сёлета нарадзілася, бадай што, новая традыцыя – у верасні Аляксандр Сапега сабраў маладых музыкантаў-барабаншчыкаў, якія толькі пачынаюць свой шлях у музыцы, і даў некалькі майстар-класаў.

"Я вельмі спадзяюся падтрымліваць гэту традыцыю і далей, — прызнаецца Аляксандр. — Гэта цудоўны і вельмі цікавы досвед. А што тычыцца фестывалю "Барабанны біт" — я спадзяюся, што мы правядзем яго і ў сёмы, і ў восьмы і ў дзясяты раз".

                                                     трыа Косці Гарачага

Сярод удзельнікаў гала-канцэрту лепшыя барабаншчыкі Беларусі: эстрадны аркестр мінскай музычнай вучэльні пад кіраўніцтвам Аляксандра Ліпніцкага (лаўрэат 1-ай ступені 2005 года), драм-стрыт шоу "Stress", Аляксандр Мінец (пераможца конкурсу 2009 года) і трыа Косці Гарачага, гурт "Apple Tea", ансамбль акардэаністаў "Фестываль".

                                                                 Аляксандр Мінец

Нязменны вядучы фестывалю — Зміцер Падбярэзскі назваў Аляксандра Мінца адным з самых запатрабаваных барабаншчыкаў Беларусі:

"Аляксандр супрацоўнічаў з гуртамі "Ізаляцыя", "Метро", джаз-бэндам музычнай вучэльні, працаваў у эстрадна-духавым аркестры "Няміга" і нават выступаў у жывым эфіры праграмы "Ваша лато, — жартуе Зміцер. — А цяпер ён — барабаншчык гурта "Hush". Бачыце, якіх людзей выпускае на прафесійную сцэну конкурс "Барабанны біт".

Пасля свайго сольнага выступу, Аляксандр Мінец разам з клавішнікам Косцем Гарачым і басістам Вячаславам Сяргіенка выканалі кавер на песню "Pink" з рэпертуару гурта "Aerosmith".

                                                           ансамбль "Фестываль"

                                                                  Уладзімір Федарук

"А калі збіраемся разам — працуем менавіта для душы", — смяецца адзін з удзельнікаў "Фестывалю", акардэаніст гурта "Лепрыконсы" Уладзімір Федарук.

"Фестываль" — калектыў, які здольны выконваць музыку ў самых розных стылях: джаз, фольк, папулярная класіка, рок. Гэтым разам музыканты ўскалыхнулі залу балканскімі матывамі.

Пад завесу першай часткі канцэрта парадавалі сваім высокаякасным выступам драйвовыя "Apple Tea". Музыканты выканалі 2 п’есы на "марскую" тэматыку: новую кампазіцыю "Rio breeze", якая нарэшце атрымала назву. А для выканання наступнай п’есы — "Клайпеда" — да "Apple Tea" далучыўся сын Аляксандра Сапегі — Ян.

                                                                        Ян Сапега

Другая частка канцэрту — "25 гадоў за барабанамі" — была прысвечана сёлетняму беніфіцыянту — Кірылу Шавандо.

                                                                       Кірыл Шавандо

                                                               Grig Percussion Group

                                Любімы вучань Кірыла Шавандо — Яўген Гаўрусеў

"Я вельмі ўдзячны вам за тое, што вы мяне яшчэ раз запрасілі ў Беларусь. Гэта сапраўды гонар, граць на адной сцэне з такімі музыкантамі!" — кажа Крэйг са сцэны.

Гала-канцэрт VI-га фестывалю "Барабанны біт" завяршыўся ўжо традыцыйным джэм-сэйшнам удзельнікаў канцэрта. Феерычнае шоў з вельмі магутнай энергіяй зорак-удзельнікаў фестывалю трымала напал страсцей гледачоў амаль 4 гадзіны — 4 гадзіны барабаннага марафона з містэрыяй рытму і гуку.