У Беларусі абвешчаны аранжавы ўзровень небяспекі з-за ветру і снегу
6 красавіка чакаюцца ўзмацненне ветру і моцны снег / pixabay.com
У Беларусі 6 красавіка прагназуецца ўзмацненне ветру і моцны снег, абвешчаны аранжавы ўзровень небяспекі, паведамляе Белгідрамет.
На працягу дня будзе воблачна. У большасці раёнаў, галоўным чынам на паўднёва-ўсходняй палове краіны, чакаюцца ападкі ў выглядзе мокрага снегу і дажджу.
У Мінску і Магілёве магчымы завеі, на асобных участках дарог — галалёдзіца.
Парывы паўночнага і паўночна-ўсходняга ветру месцамі будуць узмацняцца да 20 м/с. Мінімальная тэмпература паветра ўначы складзе –4 °C, максімальная ўдзень — +4 °C.
У МНС папярэдзілі, што такія ўмовы надвор’я могуць прывесці да зніжэння бачнасці на дарогах, частковага разбурэння будынкаў і дахаў, абрываў ліній электраперадач і сувязі.
