Стала вядома пра гібель беларуса з Рэчыцы, які ваяваў за Расію

Стала вядома пра гібель ва Украіне яшчэ аднаго беларуса, які ваяваў на баку Расіі. 44-гадовы Мікалай Коваль з Рэчыцы загінуў улетку 2024 года, піша "Наша Ніва".

Мужчына скончыў Гомельскі дзяржаўны прафесійна-тэхнічны каледж кулінарыі і Гомельскі інжынерны інстытут МНС. Адслужыў у паветрана-дэсантных войсках. Нейкі час ён працаваў ратавальнікам на аб'екце "Беларуснафты" пад Рэчыцай, быў начальнікам каравула. Потым стаў індывідуальным прадпрымальнікам.

Выданне піша, што на Коваля пачыналі крымінальную справу за наўмыснае знішчэнне або пашкоджанне маёмасці (частка 1 артыкула 218 КК), але потым спынілі.

Калі Коваль паехаў ваяваць, невядома. Служыў у 254-м мотастралковым палку (в/ч 91704), што дыслакаваўся ў Бранскай вобласці.

У траўні 2024-га мужчыну паранілі, ён трапіў у шпіталь у Белгарадзе. Адтуль вярнуўся на фронт, быў камандзірам узвода. А з 4 ліпеня 2024-га лічыўся зніклым без звестак.

Пра яго смерць 30 жніўня летась напісала ў сацсетках яго маці — Таццяна Коваль: "Сыночак наш едзе дадому з СВА навечна маладым".

Пасмяротна Коваля ўзнагародзілі Ордэнам мужнасці Расійскай Федэрацыі. У мужчыны засталіся жонка і дзеці.