Падаткавікі хочуць ліквідаваць чарговую праваабарончую арганізацыю
З адпаведнай прапановай Міністэрства па падатках і зборах звярнулася ў Мінюст. Ліквідаваць прапануюць Беларускі Хельсінкскі камітэт.
Пра гэта Еўрарадыё распавёў кіраўнік БХК Алег Гулак:
Гулак: "Міністэрства па падатках звярнулася ў Міністэрства юстыцыі з прапановай — не больш! Але і не менш... Далей будзе Міністэрства юстыцыі вырашаць, што з гэтым рабіць, бо звяртацца па ліквідацыю — гэта ўжо кампетэнцыя Мінюсту".
У законе не прапісаны час, за які Мінюст можа разгледзець такую прапанову. Як кажа старшыня БХК, у гэтым пытанні ўсё залежыць ад волі чыноўнікаў.
Нагадаем, што падаткавікі некалькі гадоў судзяцца з БХК. Яны хочуць спагнаць падаткі з грантаў Еўракамісіі, якія, паводле міжнародных дамоваў, вылучаліся Беларусі ў беспадаткавым рэжыме. Агулам падаткавікі налічылі ўжо 240 мільёнаў рублёў падаткаў і штрафаў. Калі БХК ліквідуюць, кажа Гулак, гэтыя грошы хутчэй за ўсё проста спішуць.
