Ватыкан: Папа Рымскі Бенедыкт XVI не збіраецца ў Беларусь
Папа дагэтуль не атрымаў афіцыйнага запрашэння наведаць нашу краіну
Аляксандр Лукашэнка двойчы за апошнія месяцы выказаўся, маўляў, хацеў бы бачыць пантыфіка на беларускай зямлі. Цікава, што пра афіцыйнае запрашэнне Папы нічога не ведаюць ні ў МЗС Беларусі, ні ў прэс-службе кіраўніка дзяржавы, ні ў Ватыкане.
Першае публічнае запрашэнне з вуснаў Лукашэнкі сенсацыйна прагучала ў чэрвені падчас афіцыйнага візіту ў Мінск дзяржсакратара Ватыкана Тарчызіё Бертонэ. Тады высокі госць сказаў на прэс-канферэнцыі ў беларускай сталіцы, што "Прэзідэнт Беларусі звярнуўся з афіцыйным запрашэннем да Папы Бенедыкта XVI наведаць Беларусь".
Але ж аднаго вуснага запрашэння, безумоўна, мала. Гэта пацвярджае кіраўнік прэс-службы прэзідэнта Павел Лёгкі:
"Гэта мусіць быць афіцыйны дакумент, натуральна. Гэта ж не вусна перадаецца, запрашэнне".
Каб даведацца, ці існуе гэты афіцыйны дакумент і ці быў ён адпраўлены ў Ватыкан, Еўрарадыё патэлефанавала ў Міністэрства замежных спраў Беларусі. У яго прэс-службе не змаглі пацвердзіць, што афіцыйнае запрашэнне было, але адзначылі:
"Калі прэзідэнт кажа, што "мы запрашаем", то няма падставаў ўзяць гэта пад сумненне".
Таксама прэс-служба МЗС прапанавала праясніць сітуацыю ў прэс-службе кіраўніка дзяржавы.
Павел Лёгкі таксама не ведае пра існаванне афіцыйнага запрашэння:
"Кіраўнік прэс-службы прэзідэнта можа аб гэтым нават і не ведаць. Таму што плыні дакументаў ідуць па розных каналах... А вось калі нейкая прапанова прынятая і прыходзіць адказ, і арганізуецца сустрэча, тады ўжо ў мяне з'яўляецца інфармацыя, што адбудзецца сустрэча".
Чыноўнік перакананы, што калі падобнае запрашэнне і было, пра яго мусілі б ведаць у МЗС... У прэс-службе МЗС нам прапанавалі пацікавіцца ў прэс-службе Ватыкана, ці разглядаюцца там магчымасці візіту Папы ў Беларусь:
"Папа Рымскі - гэта чалавек, у якога на гады наперад распісаны графік. Мы імкнемся патрапіць у гэты графік. Але тут пытанне ў тым, што мы можам вельмі-вельмі хацець яго бачыць у нашай краіне, але ён аб'ектыўна можа быць заняты ў нейкія тэрміны".
У Апостальскай нунцыятуры ў Мінску Еўрарадыё паведамілі, што не маюць ніякай дакладнай інфармацыі на конт афіцыйнага запрашэння:
"Афіцыйнай інфармацыі пакуль няма".
У прэс-службе Ватыкана таксама афіцыйнага запрашэння не бачылі. Вось што паведаміла Еўрарадыё адна з яе супрацоўніц:
"У нас у календары нічога не пазначана. У нас нічога не запланавана".
У тое, што афіцыйнае запрашэнне магло дзесьці згубіцца, верыцца слаба.
Аляксандр Лукашэнка двойчы за апошнія месяцы выказаўся, маўляў, хацеў бы бачыць пантыфіка на беларускай зямлі. Цікава, што пра афіцыйнае запрашэнне Папы нічога не ведаюць ні ў МЗС Беларусі, ні ў прэс-службе кіраўніка дзяржавы, ні ў Ватыкане.
Першае публічнае запрашэнне з вуснаў Лукашэнкі сенсацыйна прагучала ў чэрвені падчас афіцыйнага візіту ў Мінск дзяржсакратара Ватыкана Тарчызіё Бертонэ. Тады высокі госць сказаў на прэс-канферэнцыі ў беларускай сталіцы, што "Прэзідэнт Беларусі звярнуўся з афіцыйным запрашэннем да Папы Бенедыкта XVI наведаць Беларусь".
Але ж аднаго вуснага запрашэння, безумоўна, мала. Гэта пацвярджае кіраўнік прэс-службы прэзідэнта Павел Лёгкі:
"Гэта мусіць быць афіцыйны дакумент, натуральна. Гэта ж не вусна перадаецца, запрашэнне".
Каб даведацца, ці існуе гэты афіцыйны дакумент і ці быў ён адпраўлены ў Ватыкан, Еўрарадыё патэлефанавала ў Міністэрства замежных спраў Беларусі. У яго прэс-службе не змаглі пацвердзіць, што афіцыйнае запрашэнне было, але адзначылі:
"Калі прэзідэнт кажа, што "мы запрашаем", то няма падставаў ўзяць гэта пад сумненне".
Таксама прэс-служба МЗС прапанавала праясніць сітуацыю ў прэс-службе кіраўніка дзяржавы.
Павел Лёгкі таксама не ведае пра існаванне афіцыйнага запрашэння:
"Кіраўнік прэс-службы прэзідэнта можа аб гэтым нават і не ведаць. Таму што плыні дакументаў ідуць па розных каналах... А вось калі нейкая прапанова прынятая і прыходзіць адказ, і арганізуецца сустрэча, тады ўжо ў мяне з'яўляецца інфармацыя, што адбудзецца сустрэча".
Чыноўнік перакананы, што калі падобнае запрашэнне і было, пра яго мусілі б ведаць у МЗС... У прэс-службе МЗС нам прапанавалі пацікавіцца ў прэс-службе Ватыкана, ці разглядаюцца там магчымасці візіту Папы ў Беларусь:
"Папа Рымскі - гэта чалавек, у якога на гады наперад распісаны графік. Мы імкнемся патрапіць у гэты графік. Але тут пытанне ў тым, што мы можам вельмі-вельмі хацець яго бачыць у нашай краіне, але ён аб'ектыўна можа быць заняты ў нейкія тэрміны".
У Апостальскай нунцыятуры ў Мінску Еўрарадыё паведамілі, што не маюць ніякай дакладнай інфармацыі на конт афіцыйнага запрашэння:
"Афіцыйнай інфармацыі пакуль няма".
У прэс-службе Ватыкана таксама афіцыйнага запрашэння не бачылі. Вось што паведаміла Еўрарадыё адна з яе супрацоўніц:
"У нас у календары нічога не пазначана. У нас нічога не запланавана".
У тое, што афіцыйнае запрашэнне магло дзесьці згубіцца, верыцца слаба.
