Ускладанне кветак можа быць расцэненае як эканамічнае злачынства?

22/05/2007 - 14:17

22 траўня лідэр Вілейскай філіі Аб’яднанай грамадзянскай партыі Уладзімір Малярчук звярнуўся у мясцовыя органы міліцыі і пракуратуры з афіцыйным запытам. Справа тычыцца дзеянняў праваахоўных і фіскальных органаў у нядзелю, калі беларускія дэмакраты ускладалі кветкі да месца пахавання ахвяр сталінскіх рэпрэсій у вёсцы Касута.

Па словах Уладзіміра Малярчука, у гэты дзень Вілейку наведалі сустаршыня грамадскага руху ўшанавання памяці ахвяраў рэпрэсій Юры Кузьняцоў, Уладзімір Колас і Сяргей Законнікаў. Разам з мясцовымі актывістамі дэмакратычнага руху яны і накіраваліся ў Касуту, каб ускласці кветкі да ўсталяванага там крыжа, паставіць свечкі і прачытаць малітву.

Падчас руху людзей суправаджалі супрацоўнікі міліцыі, мясцовага і абласнога ўпраўлення КДБ і, чамусці, АБЭЗ (аддзел па барацьбе з эканамічнымі злачынствамі). На працягу ўсяго жалобнага мерапрыемства удзельнікаў шэсця здымалі на відэакамеру.

Уладзімір Малярчук сваім запытам начальніку міліцыі спрабые высветліць, з якой нагоды калону людзей суправаджаў АБЭЗ, а пракурору раёна – на якой падставе вялася відэаздымка мерапрыемства.