У Беларусі пачалося датэрміновае галасаванне па выбарах дэпутатаў

23 верасня ў Беларусі пачалося датэрміновае галасаванне па выбарах дэпутатаў Палаты прадстаўнікоў Нацыянальнага сходу.
Як нагадвае БелаПАН, датэрміновае галасаванне будзе праходзіць на працягу пяці дзён — па 27 верасня. У гэтыя дні ўчасткі для галасавання будуць адчыняцца ў 10.00 і зачыняцца ў 19.00. Пры гэтым пацвярджаць прычыны, чаму выбарца не можа наведваць участак у дзень галасавання 28 верасня, не патрабуецца.

Аб'яднаныя дэмакратычныя сілы Беларусі (АДС) лічаць, што датэрміновае галасаванне выкарыстоўваецца ўладамі для фальсіфікацыі вынікаў выбараў. У прыватнасці, лідэр Партыі камуністаў Беларускай Сяргей Калякін заклікаў выбарцаў не галасаваць датэрмінова.