“Ur’ia” сыграе вялікі сольнік з запрошанымі гасцямі

У дзень зімовага сонцастаяння этна-рок-шоў “Ur’ia” упершыню дасць вялікі сольны канцэрт у Мінску. Праграма, з якой гурт на чале з Юрыем Выдронкам выйдзе на сцэну КЗ “Мінск”, будзе называцца “Таўкачыкі на Каляды”.

“У выкананні “Ur’ia” на канцэрце прагучаць лепшыя песні зімовага каляндарнага цыклу, — распавядае пра цікавосткі імпрэзы Юры Выдронак. — Думаю, і нешта новенькае будзе. А з гасцямі, якія да нас завітаюць, мы зладзім эксперыменты ў межах ад аўтэнтычнага фальклору да цяжкога металу”.

Сярод гасцей “юр’еўскага” канцэрту — бабулі з Глускага раёну — разам з музыкамі яны выканаюць рок-версію народнай песні “Мамачка”. Апроч бабуль з “Юр’яй” сыграе польскі мультыінструменталіст Барталамей Лех Палыга, струнны квартэт “Аніма”, заспяваюць гурты “Талака”, “Грамніцы”, “Ветах” і “Re1ikt”, выступяць танцавальныя калектывы.

“Мы перапрацоўваем рытуальную музыку і спрабуем у лепшым варыянце данесці яе да слухачоў на энергетычным узроўні, — распавядае пра мэту сваёй творчасці Юрый Выдронак. — Замежная публіка не разумее беларускай мовы, ды і, мяркую, частка беларусаў не адразу разумее архаічныя рытуальныя тэксты, Але калі ты энергетычна даносіш іх да людзей, то гэта падабаецца. Гэта ўводзіць у транс, спецыфічны рэзананс. І публіка адчувае гэта, незалежна ад ведання мовы. Я думаю, што ў нас на канцэрце гэта будзе”.

Дарэчы, Юрый папярэджвае, што канцэрт “Юр’і” не варта блытаць з фэстам “Таўкачыкі на Каляды” — ён будзе, але крыху пазней. Такім чынам, 23 снежня, вялікая зала КЗ “Мінск”. 19.00. Канцэрт пройдзе пры фінансавай падтрымцы Міністэрства культуры Беларусі.