На што звяртаць увагу, калі бярэш спажывецкі крэдыт у банку

“Самы асноўны камень — камісіі — адмянілі, але, як паказвае практыка, некаторыя банкі пайшлі на хітрыкі”, — кажа галоўны рэдактар сайта “Іnfobank.by” Жанна Кулакова. Знайсці падводныя камяні можна толькі пры дапамозе ўласнай уважлівасці.

Дзяўчына з інфа-цэнтра “Самбелбанка” радуе нізкімі працэнтнымі стаўкамі. Каб я дакладна паверыла ў сапраўднасць нізкіх працэнтаў, дзяўчына паўтарае інфармацыю некалькі разоў.

“Пад 7,17%! Пад 7 коска 17 працэнтаў! Гэта крэдыт “Навагодні” на агульных умовах без даведак і паручальнікаў. А раней была стаўка 24%”.

Атрымліваецца, стаўка яшчэ і знізілася! На справе ж аказваецца, што гэта працэнтная стаўка за месяц — за год яна складзе амаль 85%. І за ўзятыя 10 мільёнаў давядзецца аддаваць 15 мільёнаў!

Эксперт заўважае, што трэба звяртаць увагу і на тое, як вы будзеце выплачваць працэнты і пазыку.

“Больш выгадным з'яўляецца варыянт пагашэння, пры якім працэнты налічваюцца на рэшту доўгу. Гэты спосаб больш выгадны, так як працэнты лічацца на рэшту запазычанасці. Па крэдытах, якія трэба будзе вяртаць роўнымі часткамі, пераплата будзе значна больш. Таксама важна, каб не было ніякіх плацяжоў штомесячных у працэнтах ад першапачатковай сумы крэдыту - яны могуць павялічыць пераплаціць ў разы.”, — заўважае Жанна Кулакова.

Яшчэ адно новаўвядзенне банкаў — абаненцкая плата за карыстанне крэдытам — гэта тыя ж камісіі, выплаты за афармленне папер, за паручальнікаў і гэтак далей. У "ВТБ-банку" гэтая плата складае амаль 400 тысяч рублёў плюс працэнты.

Некаторыя банкі прывязалі сваю працэнтную стаўку па крэдытах да стаўкі рэфінансавання.

Хуткі крэдыт ад “Белрасбанка” даволі празрысты. Дзяўчына інфарм-цэнтра падрабязна кажа пра ўсе моманты крэдытавання.

“Мы можам даць вам крэдыт на 15 мільёнаў, на чатыры гады пад 55% гадавых. Першапачатковыя ўзносы будуць за страхаванне жыцця, за афармленне і выдачу карткі і камісія за выдачу грошай — 3% ад сумы”, — і толькі цягам размовы высвятляецца, што стаўка будзе залежаць ад стаўкі рэфінансавання.

Нават далёкі ад крэдытавання чалавек ведае пра ўласцівасць стаўкі рэфінансавання мяняцца. На гэта разлічвае кліент.

“Сапраўды, залежнасць ад стаўкі рэфінансавання звычайна дае надзею, што стаўка па крэдыце праз паўгода знізіцца, але ёсць банкі - не буду іх называць - якія ў дамове на крэдыт фіксуюць стаўку на момант падпісання папер. І калі стаўка рэфінансавання знізіцца і на самай справе, то стаўка па крэдыце знізіцца толькі для тых, хто будзе заключаць новую дамову ”, — раскрывае хітрасць Жанна Кулакова.

Самы ж асноўны момант, на які трэба звяртаць увагу, на думку эксперта, — гэта не поўная працэнтная стаўка, а сума пераплаты.

“Банк агучвае суму выплаты і называе вельмі псіхалагічна камфортную суму, але найбольш рэальную сітуацыю вам пакажа сума пераплаты”, — раіць эксперт.

У асобных банках, калі вы возьмеце 25 мільёнаў, пераплачваць звыш сумы прыйдзецца 49 мільёнаў! Многія кліенты на момант атрымання крэдытаў проста да гэтага не гатовыя.