На новым альбоме Kriwi джаз і фанк саступілі месца электроннай медытацыі

Пад Новы год Kriwi выдаюць новы альбом “Traukamurauka”. Выхад доўгачаканай пласцінкі ад беларускіх фольк-эксперыментатараў прымеркаваны да 15-годдзя праекту. Як падкрэслівае Вераніка Круглова, альбом — гэта своеасаблівы знак падзякі ўсім музыкам, якія спрычыніліся да Kriwi. Да таго ж, пласцінка стане прыемным калядным падарункам фэнам і сябрам каманды.

“Праца вельмі цікавая, таму што ў ёй спалучаюцца прыгожыя вакальныя аранжыроўкі і цікавая электроніка, — распавядае пра новы дыск Вераніка. — Атрымаўся медытатыўны альбом, свайго роду музычная тэрапія. Пад яго можна адпачываць і нават танчыць. Спакойны, прыгожы, жаночы альбом”.

У альбом Kriwi увойдуць 10 песень, якія выконваліся праектам на канцэртах у розных варыяцыях, рознымі інструментамі і музыкамі. Апроч Веранікі Кругловай у запісе пласцінкі ўзялі ўдзел яшчэ чатыры вакалісткі — сяброўка, сястра, пляменніца і дачушка Ё-Ё. Сябры-музыкі прыдумалі аранжыроўкі для твораў. І нават гукарэжысёр, успамінае Круглова, не толькі рабіў сваю непасрэдную працу, але і граў, спяваў і аранжыраваў некаторыя песні.

Вокладку альбома “Traukamurauka” намалявала мастачка Жанна Капуснікава, дызайн зрабіў Юры Білык. Да таго ж, дыск выйдзе на расійскім лэйбле сябра Kriwi Руслана Макарава — “MSH-records”, які паходзіць з Беларусі і праславіўся ў нашых шыротах выпускам складанкі “Personal Depeche”. Вераніка падкрэслівае, што пласцінка створаная пры дапамозе сяброў, яна не ставіць перад сабой камерцыйных мэтаў.

Спявачка спадзяецца, што альбом будзе прадавацца на Радзіме. У яго падтрымку Kriwi зладзяць тур па Беларусі.