Былы суддзя не змог у судзе даказаць сваю невінаватасць

Сёлета пракуратура ў чарговы раз вырашыла перагледзець яго справу.

Пяць гадоў юрыст са Жлобіна Сяргей Ярашэвіч безвынікова спрабуе даказаць, што не здзяйсняў злачынства, у якім яго абвінавацілі і за якое асудзілі калегі з мясцовага суда. Як расказаў Еўрарадыё Сяргей, у гэтым жа Жлобінскім раённым судзе ён адпрацаваў пяць гадоў, і яшчэ сем — адвакатам. Але калі трапіў на лаву падсудных сам, то даказаць сваю невінаватасць не здолеў.

Усё пачалося з заявы былога міліцыянера, які сцвярджаў, што адвакат яго збіў.

Сяргей Ярашэвіч: “Напісаў на мяне заяву, што я, праязджаючы па вуліцы Жлобіна, выскачыў з машыны, ударыў яго два разы і з месца здарэння з’ехаў. Згодна з яго заявай, я яго пабіў а 17 гадзіне 15 ліпеня 2005 года”.



Ярашэвіч прызнае, што менавіта ў гэты час сапраўды праязджаў у тым месцы, якое пазначана ў заяве. Але ж сцвярджае, што не спыняў машыну і нікога не біў. Доказам таму магла б стаць выпіска з бальнічнай карткі “пацярпелага”. Згодна з ёй, па медыцынскую дапамогу той звярнуўся ў паліклініку а 22 гадзіне. І дактарам сказаў, што траўмы атрымаў у бытавых умовах дзве гадзіны таму. Атрымліваецца, што збілі яго а 20 гадзіне, а не а 17, як ён напісаў у заяве ў міліцыю.



Апроч таго, з “пацярпелым”, былым супрацоўнікам мясцовай міліцыі, у адваката даўно былі далёка не сяброўскія адносіны, Ярашэвіч называе яшчэ адну прычыну з’яўлення гэтай заявы.

Сяргей Ярашэвіч: “Працуючы адвакатам Жлобінскай юркансультацыі, я абараняў хлопца, які збіў жлобінскага міжрайпракурора. І праз гэта ў мяне пачаліся праблемы. Мяне выклікалі ў аддзел міліцыі і сказалі: “Вы пакрыўдзілі нашага пракурора, і ён прасіў любымі сродкамі прыцягнуць вас да якой-небудзь адказнасці, каб пазбавіць адвакацкай практыкі”. А я сказаў, што са мной чалавек заключыў пагадненне і я павінен яго абараняць”.

Сведкамі супраць Ярашэвіча на судзе выступіла былая жонка “пацярпелага” і мужчына, які адгукнуўся на абвестку аб пошуку сведкаў здарэння. Але падчас суда той ад сваіх паказанняў адмовіўся.

Сяргей Ярашэвіч: “Знайшоўся сведка, які прызнаўся потым: “Сяргей Дзмітрыевіч, ваш фотаздымак мне паказалі і сказалі, што гэтага чалавека трэба “зрабіць”, ён міліцэйская "шасцёрка", ён шмат нашых людзей пасадзіў. Але на судзе гэты сведка сказаў: “Паважаны суд, я абгаварыў гэтага чалавека, я не ведаў, што ён працуе адвакатам”.

Праўда, ні на непаразуменні з часам здарэння, ні на прызнанні гэтага сведкі суд увагі не звярнуў. І яшчэ: следства па здзяйсненні Ярашэвічам дробнага хуліганства вялі не мясцовая міліцыянеры, як тое мусіла быць, а следчы Рагачоўскай пракуратуры. У выніку суд Рагачова прысудзіў адвакату 3 мільёны штрафу і адхіліў яго ад працы ў юркансультацыі.

Ужо былы адвакат напісаў скаргу ў абласны суд. Справу накіравалі на перагляд … ізноў у Рагачоўскі суд, які пакінуў прысуд без зменаў. Абражаны юрыст раскрытыкаваў у кнізе водгукаў суда суддзяў, якія разглядалі яго справу. За што ізноў паплаціўся.

Сяргей Ярашэвіч: “Суддзі напісалі на мяне заяву: маўляў я іх абразіў падчас судовага разгляду справы. Пракурор імгненна распачынае крымінальную справу паводле артыкулу 381 і накіроўвае справу ў Светлагорскі суд, які дае мне два гады папраўчых прац за знявагу суддзі падчас ажыццяўлення правасуддзя”.

Абласны суд пасля лінгвістычнай экспертызы гэты прысуд адмяніў, але штраф за першае “правапарушэнне” пакінуў у сіле. Ярашэвіч жа вырашыў грошы не плаціць, а ўзяўся даказаць сваю невінаватасць. Тым больш, што і першая сведка, былая жонка “пацярпелага”, адмовілася ад сваіх паказанняў і прызналася, што агаварыла адваката.


Сяргей Ярашэвіч: “Пасля гэтага я звярнуўся да старшыні абласнога суда, чатыры разы быў у Вярхоўным судзе, даказваў, што я не здзяйсняў гэтага злачынства і што ўказваў на тыя супярэчнасці, якія ёсць нават у матэрыялах справы. У выніку — адказ: усё правільна, усё законна. Я звяртаўся ў Адміністрацыю прэзідэнта, Службу бяспекі, неаднаразова на імя самога прэзідэнта дасылаў тэлеграмы, звяртаўся да дэпутата Палаты прадстаўнікоў ад нашай Жлобінскай выбарчай акругі”.

Але, кажа, усё безвынікова — адусюль атрымліваў адпіскі. А тое, што сведкі прызналіся ў ілжы падчас суда, нікога не хвалюе. З Адміністрацыі ж адказваюць, што не маюць права ўмешвацца ў кампетэнцыю суда.









Цяпер справу Сяргея Ярашэвіча ў чарговы раз правярае пад кіраўніцтвам старшага памочніка пракурора Андрэя Анушкі Жлобінская міжрайпракуратура. Згодна з яго словамі, гэтая справа заблытаная, але, маўляў, яны паспрабуюць яе разблытаць і прыйсці да нейкай высновы.

Андрэй Анушка: “Разглядзім усё аб’ектыўна, і рашэнне яму паведамім. Я не магу сказаць пра яго (Ярашэвіча — ЕРБ) ні дрэннае, ні добрае. Расказваць пра гэтую справу можна гадзінамі, але інфармацыя павінна быць аб’ектыўная. Тут сапраўды гісторыя заблытаная, з барадой, доўгая, і перыпетыі гэтай гісторыі маюць глыбокія карані. І разбірацца ў ёй яшчэ доўга і грунтоўна. Няхай чакае — і вынік будзе, да якой-небудзь высновы мы прыйдзем”.

Памочнік пракурора прызнаў, што ў Ярашэвіча ёсць падставы быць незадаволеным і судом, і следствам. Але паабяцаў, што разбірацца ў справе будзе без прадузятасці.

Фота Змітра Лукашука