Больш за 340 чалавек забіты супрацоўнікамі дзяржбяспекі новага ўрада Сірыі

Па дадзеных Сірыйскай абсерваторыі па правах чалавека, за апошнія два дні сірыйскія сілы бяспекі і звязаныя з імі баевікі забілі больш за 340 мірных жыхароў, большасць з якіх — алавіты, паведамляе Reuters. Да гэтай суполкі належалі звергнуты прэзідэнт Сірыі Башар Асад і яго сям'я. Ваенная аперацыя новага ўрада краіны пачалася ў родным горадзе былога лідара.

6 сакавіка пачалася хваля пратэстаў алавітаў супраць новай улады, якая перарасла ў баявыя дзеянні.

У чацвер сірыйскія дзяржаўныя СМІ са спасылкай на крыніцу ў міністэрстве ўнутраных спраў заявілі, што "асобныя парушэнні" мелі месца падчас урадавай аперацыі па падаўленні баевікоў, звязаных са звергнутым рэжымам Асада, і заявілі, што працуюць над устараненнем інцыдэнтаў.

Як піша DW, у суботу раніцай колькасць загінулых у выніку баявых дзеянняў ва ўзбярэжным рэгіёне Латакія ў Сірыі ўзрасла да больш за 500 чалавек. Сілы пераходнага ўрада краіны працягваюць змагацца з паўстаннем, арганізаваным баевікамі, лаяльнымі Башару Асаду.

З моманту пачатку баявых дзеянняў часовы прэзідэнт краіны Ахмед аль-Шараа сказаў, што Сірыя будзе пераследваць "рэшткі" звергнутага рэжыму Асада і аддасць іх пад суд.

У снежні 2024 года сірыйскія паўстанцы аб'явілі аб завяршэнні 24-гадовага аўтарытарнага праўлення Башара Асада. Тады ён пакінуў Дамаск, яму падалі прытулак у Расіі. Новы ўрад узначалілі прадстаўнікі групоўкі "Хаят Тахрыр аш-Шам".