З падачы Таццяны Севярынец да вязняў КДБ пусцяць святара?
Маці Паўла Севярынца Таццяна дабіваецца, каб яе сын мог спавядацца ў следчым ізалятары КДБ. Святары — не супраць.
У гутарцы з Еўрарадыё Таццяна адзначыла, што на яе просьбу адгукнулася шмат праваслаўных святароў. Адзін з іх, айцец Алег, нават падаваў заяву на сустрэчу з Севярынцам, але яму адмовілі.
Таццяна Севярынец хацела сустрэцца з мітрапалітам Філарэтам, але той адаслаў яе да епіскапа Веніяміна. На яе думку, вынік размовы з епіскапам быў станоўчы.
Севярынец: “Вынік, думаю, станоўчы. Ён паабяцаў, што будзе дамагацца, каб да Паўла ў СІЗА КДБ быў адпраўлены святар. Веніямін пазначыў у сябе, што менавіта айца Алега, які зрабіў для гэтага нейкія крокі, яны і адправяць на сустрэчу з Паўлам, калі гэтае пытанне будзе вырашана станоўча”.
Са словаў маці палітвязня, вырашаць гэтае пытанні епіскап будзе з кіраўніцтвам КДБ. Акрамя гэтага Таццяна Севярынец дамагаецца, каб СІЗА КДБ заключыла дамову з епархіяй. Яна хоча, каб вязні “амерыканкі” маглі ажыццяўляць свае рэлігійныя патрэбы.
