У Буда-Кашалёўскім раёне беспрацоўны паведаміў пра бомбу ў школе

У Буда-Кашалёўскім раёне "замінавалі" сярэднюю школу ў вёсцы Гусевічы. Здарэнне адбылося ў 20.30 у сераду, 30 верасня. Як інфармуе прэс-служба МУС, у навучальную ўстанову патэлефанаваў невядомы і паведаміў, што будынак замінаваны. Дырэктарка паведаміла пра гэта ў міліцыю, на месца тэрмінова адправілі сапёраў, якія нічога падазронага ў школе не знайшлі.

Адзначаецца, што ўвечары ў школе ўжо не было дзяцей. З будынка эвакуявалі толькі трох чалавек персаналу.

Міліцыя высветліла, што тэлефанаваў з паведамленнем пра выбуховае прыстасаванне 60-гадовы беспрацоўны мясцовы жыхар. Распачатая крымінальная справа.

Фота: Fotolia