На “Белкаліі” атрымліваюць 7 мільёнаў, а ў казіно абяцаюць 20

120201 Martin Zarobki.mp3

Кіраўнік Нацбанка Надзея Ермакова абяцае да канца года заробак у 500 долараў. Еўрарадыё вырашыла праверыць, колькі цяпер зарабляюць беларусы і якія спецыялісты найбольш запатрабаваныя.

“Па Мінску на 1 студзеня ў нас каля 18 тысяч вакансій. Каля 80% – рабочыя прафесіі. Найбольш запатрабаваныя будаўнікі, другое – транспарт. Сёння патрэбныя кіроўцы. Станочнікі патрэбныя. Заробкі кіроўцаў ад 2,5 мільёнаў, станочнікаў – каля 4 мільёнаў”, – расказвае Еўрарадыё начальніца Цэнтра занятасці Кастрычніцкага раёна Мінска Святлана Ярошына і дадае, што самыя вялікія заробкі ў дырэктараў і кіраўнікоў на прадпрыемствах.

Святлана Ярошына: “Ёсць шэраг буйных фірм, дзе вялікі заробак. На мінскім філіяле “Беларускай калійнай кампаніі” ёсць вакансія першага намесніка кіраўніка. Заробак каля 7 мільёнаў”.

Але такіх вакансій няшмат, заўважае Ярошына.

Некалькі чалавек у Цэнтры занятасці шукаюць працу, гартаюць вакансіі на камп’ютарах.

“Хачу падпрацаваць, цяпер я на пенсіі. Да пенсіі я швачкай працавала. 40 гадоў прапрацавала і зарабіла на пенсію ў 700 тысяч. Цяпер бы пайшла на заробак у 2 мільёны”, – кажа Галіна Іванаўна.

Яе сяброўка шукае працу бухгалтара. Таксама на пенсіі, ужо 2 гады не працуе.

Найбольш прэстыжныя вакансіі цяпер: айцішнікі і праграмісты, упэўніваюць у кадравым агенцтве “Квадрат”.

Супрацоўніца агенцтва: “Найбольш запатрабаваныя вакансіі айцішнікаў, распрацоўшчыкаў, праграмістаў. Для іх добрыя ўмовы працы, заробкі па 3 тысячы долараў і вышэй. Другое месца – менеджары па продажы”.

Спрабуем знайсці працу на сайце Мінгарвыканкама, шукаем вакансіі. У паліклініку патрабуюць лекара-эндакрынолага. Гатовыя браць нават пенсіянера ці інваліда.

“Заробак будзе ў межах 3 мільёнаў. Можна і пенсіянерам, і інвалідам, бо па візітах хадзіць не трэба”, – кажа супрацоўніца 35-й сталічнай паліклінікі.

Інкасатару Нацбанка заплацяць менш – 2 мільёны, кажуць у галоўным банку краіны. Да абяцаных Ермаковай 500 долараў пакуль не дацягваюць…

Большасць вакансій на сайце Гарвыканкама будаўнікі і кіроўцы. Заробкі ад 3 да 4 мільёнаў. А самы вялікі заробак з прапанаваных вакансій – у намесніка дырэктара казіно “Прынцэс” – 20 мільёнаў. Патрабаванне – досвед працы 7 гадоў у гульнявым бізнэсе і вышэйшая адукацыя.

Школьны настаўнік мовы і літаратуры атрымае ў дзясятак разоў менш.

“Заробак у вас выйдзе 1,8 недзе. Да канца года нам абяцаюць 500 долараў. Усім сказалі, але ж мы бухгалтары…”, – малююць перспектывы ў сталічнай школе № 135.

Белстат перадае, што сярэдні заробак у Мінску ўжо больш за 3 мільёны. А ў службу занятасці па працу летась звярнуліся больш за 300 тысяч чалавек.

Фота: bymedia.net