Лекі ад грыпу: “Антыгрыпін”, часнык і гамеапатыя

На Рок-каранацыю з-за хваробы не прыйшлі намінаваныя музыкі, суд над марозаўскай групоўкай перанеслі з-за хваробы падсуднага.

Простае насельніцтва спрабуе ратавацца, як умее. Прышчэпкі рабіць ужо позна. Што раяць нам лекары пры першых сімптомах грыпа? Гаворыць педыятар Наталля Патрасава.

Наталля Патрасава: “Для дзяцей лепшыя супрацьзапаленчыя “Антыгрыпін”, “Антыгрыпакапс”, “Ібуклін”. Ён і зніжае тэмпературу, і аказвае супрацьзапаленчае дзеянне. Здымае гарачку, інтаксікацыю. Абавязкова — пасля ежы, каб не на галодны страўнік.

Абавязковы пасцельны рэжым. Піць шмат: маліны, парэчкі, журавінавы морс, гарбату з лімонам — усё, дзе шмат аскарбінкі. І абавязкова выклікаць лекара, бо грып можна “запусціць”.

Лекары называюць грып самай недаацэньваемай хваробай на Зямлі. Мы ставімся да яго лёгка, бо часта з ім сутыкаемся. Між тым, кожны год свет траціць каля 15 міліярдаў долараў на лячэнне хваробы, але 1,5 мільёна чалавек усё адно паміраюць ад грыпу ці яго наступстваў.

У кожнага свая методыка лячэння, і шмат хто цягне да апошняга, бо не хоча прымаць антыбіётыкі. Але супрацьпастаўленне “бабуліных” метадаў антыбіётыкам састарэла. Пра альтэрнатыву і тым, і другім яшчэ будзе распаведзена, пакуль жа — пра “хатняе” лячэнне.

ДАВЕДКА ЕЎРАРАДЫЁ

Ароматэрапія цяпер у модзе, эфірныя алеі лёгка набыць у крамах. Некаторыя з іх валодаюць значнай антывіруснай актыўнасцю. На ранніх стадыях грыпу прыміце ванну з алеямі эўкаліпта, лімона, лаванды ці зрабіце сабе інгаляцыю на іх аснове.

Гарбата з цынамонам і перцам ці імбірам выратуе ад дрыготкі. Калі ў вас наадварот гарачка, вам карысна прапацець з дапамогай настою кашэчай мяты ці бузіны чорнай. Эхінацэя і шыпшына павышаюць актыўнасць імунітэту ў барацьбе з вірусамі.

Змяшайце 1:1 пацёрты часнык з мёдам і прымайце па сталовай лыжцы на ноч, запіўшы гатаванай вадой. Пасля ўсяго гэтага абавязкова звярніцеся да доктара.

Але калі ўсё гэта рабіць лянота ці няма часу, а да таблетак звяртацца ўсё адно не хочацца, вам шлях у гамеапатычную аптэку. У некаторых з іх можна нават атрымаць кансультацыю лекара-гамеапата. Пра перавагі гамеапатычных лекаў распавядае спецыяліст у гэтай сферы Ніна Іванова.

Ніна Іванова: “Сродкі, якімі мы карыстаемся, могуць быць узятыя з самых чыстых раёнаў Зямлі. Напрыклад, нейкая трава расце ў вельмі чыстым месцы ў Прыбалтыцы. Нам прывозяць яе сок, і на яго аснове робяцца лекі.

Вельмі важна, што на нашы лекі няма алергіі. Яны не маюць пабочнага ўздзеяння. І, нарэшце, яны даволі танныя: ад 5 да 7 тысячаў каштуе 25 мілілітраў нашых лекаў, і іх хапае недзе на два з паловай месяцы, гэта значыць, не на адзін сезон”.

Яшчэ адна перавага такіх лекаў — тое, што гэта гатовыя сумесі, настойкі і г.д. То бок хвораму не трэба нічога змешваць, выварваць, спалучаць. Назвы лекаў збольшага лацінскія, але некаторым комплексам даюць і нашыя.

Так, самы папулярны і рэкамендаваны сярод іх па грыпе называецца “Антыгрыпін” — не блытайце з іншым “Антыгрыпінам”, які прадаецца ў звычайных аптэках.

Што рабіць са сваім захварэлым арганізмам, кожны вырашае сам.

Еўрапейскае радыё для Беларусі і я, Кацярына Буланава, зычым вам здароўя.

Фота — www.rusrek.com