Ад журналіста патрабуюць выбачэнняў і грашовых кампенсацый
Суд Маскоўскага раёна Брэста сёння абавязаў былога журналіста газеты "Знамя Юности" Алеся Ляўчука публічна папрасіць прабачэння ў газеты за крытыку.
Судовае рашэнне прадугледжвае, што Ляўчук павінен за ўласны кошт апублікаваць у газеце абвяржэнне сваіх ранейшых выказванняў пра тое, што рэдакцыя прымушала яго пісаць негатыўныя матэрыялы пра апазіцыю.
Як распавёў Алесь у жывым эфіры Еўрарадыё, такая "публікацыя" абыйдзецца яму амаль у 300 тысяч рублёў. Акрамя таго, ён павінен аплаціць 105 тысяч рублёў судовых выдаткаў. А яшчэ рэдакцыя патрабуе ад яго кампенсаваць выдаткі на паездкі з Мінска ў Брэст прадстаўніка і сведак істца. "Камандзіровачныя" цягнуць амаль на 700 тысяч рублёў.
Ляўчук з такім вынікам працэсу не згодны і будзе яго абскарджваць у абласным судзе. Першае паседжанне можа адбыцца ўжо 2 сакавіка.
