Мікалай Аўтуховіч змешчаны ў санчастку калоніі

Аб змяшчэнні Аўтуховіча ў санчастку расказаў агенцтву БелаПАН яго былы адвакат Павел Сапелка. Паводле яго словаў, на 17 студзеня ў калоніі прызначаны суд над Аўтуховічам у сувязі з парушэннем рэжыму калоніі. Гэта будзе такі ж працэс, як той, што прайшоў над Мікалаем Статкевічам. Аўтуховічу таксама пагражае перавод з Івацэвіцкай калоніі ў турму на вызначаны судом тэрмін.

Нагадаем, што у траўні 2010 года ваўкавыскі прадпрымальнік Мікалай Аўтуховіч рашэннем Вярхоўнага суда быў прысуджаны да пяці гадоў і двух месяцаў пазбаўлення волі з адбываннем пакарання ў калоніі строгага рэжыму. Прычынай стала перавозка і захоўванне пяці патронаў да паляўнічай вінтоўкі.

Праваабаронцы лічаць Аўтуховіча палітвязнем, паказваючы на сур'ёзныя працэсуальныя парушэнні, зафіксаваныя ў часе суду. Некаторы час таму стала вядома, што ён ўскрыў сабе вены на знак пратэсту супраць дзеянняў адміністрацыі калоніі.