Лінднэр: Не будзем казаць пра свабоду СМІ ў Беларусі, бо яе няма

3 лістапада стартуе 13-ы Мінскі форум. Сёлета яго тэмай стане Беларусь і Еўрасаюз пасля крызісу. На форуме абмяркуюць палітычныя, эканамічныя і грамадскія пытанні, а таксама прагрэс дзейнасці ў рамках Усходняга партнёрства.

Арганізатар форума прафесар Райнэр Лінднэр кажа, што паказчык важнасці мерапрыемства ў тым, што ўпершыню ў ім будзе ўдзельнічаць дзейсны нямецкі міністр.

"Гэта кіраўнік Ведамства Федэральнага канцлера Германіі, Федэральны міністр па асаблівых даручэннях Рональд Пофала, які спецыяльна прыедзе на Мінскі форум. Канцлер Германіі пра гэта добра ведае і падтрымлівае ўдзел міністра ў форуме".


Дарэчы ў гэтыя дні ў Беларусі будуць прысутнічаць адразу два нямецкія міністры і гэта паказчык таго, што Германію цікавяць палітычныя працэсы, якія адбываюцца ў Беларусі. Тое, што форум адбываецца ў Мінску не значыць, што яму не надаюць увагі ў Берліне. Пры тым ён праходзіць напярэдадні вялікага беларускага інвестыцыйнага форума, які адбудзецца  ў Франкфурце-на-Майне.

"Прафесар Лінднэр ужо згадаў, што ў Мінску таксама знаходзіцца міністр замежных спраў Германіі. Прысутнасць абодвух міністраў у вашай краіне сведчыць пра тое, наколькі нам цікавыя знешнія і ўнутраныя працэсы, якія адбываюцца ў вашай краіне. Мы спадзяемся, што візіты абодвух міністраў стануць штуршком не толькі ў развіцці адносінаў Беларусі з Германіяй, але і з Еўрапейскім саюзам".

Таксама міністр канцылярыі сустрэнецца з прадстаўнікамі грамадзянскай супольнасці, патэнцыйнымі кандыдатамі ў прэзідэнты і грамадскімі арганізацыямі, нягледзячы на тое, што візіт будзе вельмі кароткім – толькі адзін дзень.

Для Беларусі важнае пытанне інавацыйныя перамены, кажа Райнэр Лінднэр, таму на форуме будзе шмат прадпрымальнікаў з Германіі, бо нямецкі бізнес вельмі зацікаўлены ў тым, каб прымаць удзел у такіх праектах. Эканамічная частка форума будзе прысвечаная развіццю малога і сярэдняга бізнесу.


На форуме закрануць пытанні кааперацыі ў сферы адукацыі і супрацоўніцтва беларускіх і нямецкіх ВНУ. У гэты ж час прэзентуюць беларуска-нямецкі слоўнік. Па словах старшыні форума, гэта фундаментальная праца, зараз студэнты Беларусі маюць магчымасць працаваць на аснове такога слоўніка. Таму ён хоча, каб гэты слоўнік атрымаў пацвярджэнне ў міністэрстве адукацыі.

Таксама для развіцця адносінаў ЕС і Беларусі і развіцця сумесных праектаў, вельмі важна, як пройдуць прэзідэнцкія выбары, але спадар Лінднэр не разлічвае на фундаментальныя змены.

"Выбары з пункту гледжання Бруселя з'яўляюцца індыкатарам, наколькі гэтыя праекты рэалізуюцца хутка. Мне падаецца усё будзе залежыць ад таго, як пройдуць выбары, якія будуць ацэнкі назіральнікаў. У гэтым годзе будзе вельмі цікава паглядзець, як будуць адрознівацца ацэнкі назіральнікаў ад СНД і АБСЕ. У мяне просьба ў бок Бруселя, не трэба рабіць прывязку паміж вынікамі выбараў і пытаннем палягчэння візавага рэжыму. Бо гэтае пытанне датычыцца грамадзян Беларусі, якія не вінаватыя ў тым, як прайшлі выбары".

Таксама размова пойдзе і пра праблемы СМІ. Напярэдадні ў інтэрв'ю СТВ, спадар Лінднэр казаў, што сітуацыя са СМІ фундаментальна змянілася. І цяпер ёсць магчымасць атрымоўваць інфармацыю.

Прадстаўнікі БАЖ пацікавіліся, на аснове чаго ён робіць такія высновы, і высветлілася, што ў кантэксце размовы гаворка вялася пра іншае. Пра змены ў параўнанні з сітуацыяй, якая была падчас першага форума ў 1997 годзе.

"Я гэта інтэрв'ю не бачыў, як яно ў выніку было паказанае. Пытанне было такое: Што змянілася, што датычыцца СМІ, калі параўнаць пачатак Мінскага форума і сённяшнюю сітуацыю. Вядома, і гэта адназначна, што мы не будзем казаць пра свабоду СМІ ў Беларусі, таму што яе няма".